Amo 5 | ZomZIV | STEP | Israel innkuante aw, note tawh kisai-a ka tamlawhna hih kammal za un:

Amos 5

Tamlawhna le Kisik nading Sapna

1 Israel innkuante aw, note tawh kisai-a ka tamlawhna hih kammal za un: ^a

2 “A Bit Israel pukta hi; ^b
tho kik ngei nawn lo ding hi.
Ama leitangah lum dildel hi;
a phong ding kuamah om lo hi.”

3 Hih in Thupipen TOPA gen ahi hi:

“Israel khuapi lian in a thahat tulkhat kuansak a,
zakhat bek nungta lai hi;
khuapi khat in a thahat zakhat kuansaka,
sawm bek a nungta lai hi,”

4 Hih in Israel innkuan tunga TOPA gen ahi hi:

“Hong zong unla nungta un; ^c
5 Bethel zong kei un,
Gigal ah pai kei un, ^d
Beersheba ah zin kei un.
Ahang in, Gilgal saltang taktak dinga,
Bethel bangmah lo kisuaksak ding hi,” ^{▼▼5.5 Ahikeh dah; ahikeh gitlohna; Hebrew ah Aven, Beth Aven kawkna (Bethel vang beisakna min)
,} ^f
6 TOPA zong unla nungta un, ^g
tua hikei leh Joseph innkuante tungah mei bangin hong kuang dinga, ^h
tua in hulin,
Bethel in a phelh ding kuamah a ngah kei ding hi. ⁱ
7 Thutang khaatna suah a, ^j
thumaan leilaka a lawn note aw, ^k
8 (Pleiades le Orion bawlpa, ^l
khuamialna nisuak tung a suaksakpa, ^m
sunni mialsaka zan a suaksak,
tuipi tui sama,
lei maitanga a sungpa -
ama min TOPA ahi hi.
9 Mun muanhuaite susia dingin amah manlang a,
a kilim um mahmah khuapi a susia hi) ⁿ
10 Note in thukhen zuma thumaan gen siamte na mudah uh a, ^o
thumaan gente na hua uh hi. ^p
11 Mizawngte na tuancil uh a, ^q
a antang teng uh ut lopipi-in na kipiasak uh hi.
Tua ahi manin suang kiseek inn na lam uh hangin
a sungah na teng kha kei ding uh hi;
lenggui hoihna lo na neih uh hangin
lenggahzu na dawn kha kei ding uh hi. ^r
12 Ahang in, na langpanna zah uh le
na mawhnate uh a liatna ka thei hi.
A thumaante nengniamin, golhsum na la uh a,
thukhen zumte ah mizawngte thu amaanin na khensak kei uh hi.
13 Tua ahi ciangin hunte gilo ahi manin
tua bang hun ciangin a ngaihsun thei mite daitakin a om uh hi. ^s
14 Na nuntak nadingun
gitlohna zong loin a hoih zong un. ^t
Tua ciangin amah a hi ngeisa hi na cih bang tektekun,
TOPA Thahatpen Pasian note tawh hong omkhawm ding hi.
15 Gitlohna mudah un, thu hoih it un; ^u
thukhen zum ah amaanin thu khen un. ^v
Tua hileh TOPA Thahatpen Pasian in
a baanglai Joseph hong lainat kha thei ding hi. ^w

16 Tua ahi manin Topa Thahatpen TOPA Pasian gen hih ahi hi:

“Lampi dung khempeuh le mihon kikhopna
mun khempeuh ah nasa-in kapa thumna a om ding hi. ^x
Lokho mite a kap dingin kisam dinga,
kah siamte a thum dingin kicial ding hi. ^y
17 Note omna munmun ah hong pai ding ka hi manin
lenggui lo khempeuh ah kithum ding hi,” ^z

TOPA in cikhia hi.

TOPA’ Ni

18 TOPA ni a ngaklah note,
gimna nak thuak na nucia!
Bang hangin TOPA ni ngaklah na hi uh hiam?
Tua ni-in khua vak loin mial bikbek ding hi. ^aa
19 Tua in humpinelkai kihta-in a tai leh
vompi a tuak tawh kibang bek dinga,
a inn sungah luta
kawm ah a khut nga leh
gul in a tuk tawh kibang bek ding hi. ^ab
20 TOPA ni-in khua vak loin khua kimialsak ding -
mial bikbekin khuavak-zang khat zong om lo ding hi lo ahi hiam? ^ac
21 “Na biakna pawite uh mudahin ka simmawh hi; ^ad
na kikhopnate uh ka cimtak hi. ^ae
22 Meihal biakna le an-a biakna nong puak uh zongin
tuate kong sang kei ding hi. ^af
Kilawmtakna biakna ^{▼▼5.22 Tang ngeina-in kilemna biakna} tuam nong puak uh hangin
tuate ka thusim kei ding hi. ^ah
23 La sa-in gamlum nawn kei dih un!
Na harp gingte uh ka ngai kei ding hi. ^ai
24 Ahi hangin gun bangin thutang luangluangin ^aj
thumaan ahileh a kang ngei lo luitui bangsak un!
25 Israel innkuante aw, sehnel-gam ah kum sawmli na om sungun
biakpiakna le biakna hong pia na hi uh hiam? ^ak
26 Nomau bawltawm - na kumpipa uh biakbukno,
na milimte tunna uh le
na pasian ^{▼▼5.26 Ahikeh Na kumpipa uh Sakkuth / na milim uh Kaiwan / na aksi-pasiante uh na lamto uh hi; Septuagint ah Molech biakbukno / le na aksi pasian uh Rephan / amau milimte lamto in} uh aksite
na thupisak uh hi.
27 Tua ahi manin note Damascus khengin salin kong puak ding hi,”
ama min TOPA Thahatpen Pasian in a ci hi. ^am